1Jo 2 | YML | STEP | Ekwavo, 'omi 'wa vetumagana Iesu 'waineye begaidi a ve'awa-natuna 'waimie wata a nuakalikaliemi. A vonevonemi bega kebu 'wa na sakonaga. We'e 'ai'edi tamu aitoi i na sakonaga, yada To'aivaita i miamia i vevelu'ui faifaida Tamada 'waineye, bega yada sakona i na nuatavunidi. To'aivaitanina Iesu Keliso, yana sauluva matatabuna tonovidi.

1 John 2

Keliso taunina 'ada to'aivaita.

1 Ekwavo, 'omi 'wa vetumagana Iesu 'waineye begaidi a ve'awa-natuna 'waimie wata a nuakalikaliemi. A vonevonemi bega kebu 'wa na sakonaga. We'e 'ai'edi tamu aitoi i na sakonaga, yada To'aivaita i miamia i vevelu'ui faifaida Tamada 'waineye, bega yada sakona i na nuatavunidi. To'aivaitanina Iesu Keliso, yana sauluva matatabuna tonovidi. 2 Taunina, Yaubada yana nuasako 'waideye i tovibodeni bega ta veiana Yaubada taiadi wata 'wainega Yaubada yada sakona i nuatavunidi, siwe kebu 'aise'avadaga, wata tomia fwayafwaya matatabudi.

3 'Ai'edi Yaubada yana veimea matatabuna ta na vevematayakeyakediga, ta 'asetai mogitana 'ida Yaubada taiadi ta veiana. 4 'Ai'edi tamu tomogo i na vo, Yau Yaubada taiadi a veiana,” siwe yana veimea kebu i na vevematayakeyakediga, taunina tovekali wata Yaubada yana nuanua tonovidi kebu yana nuanua 'waineye i da 'eno'enovi. 5 We'e 'ai'edi aitoi Yaubada yana vona i na vevematayakeyakediga, yana nuakalikali Yaubada 'waineye, nuakalikali mogitana. 'Ai'edi aitoi i na vo, Yau a tauyeku Yaubada 'waineye a miamia,” i lubwaineni 'asa'aiana bani'odi Iesu Keliso yana sauluva i na vevetutuyamedi. 'Ai'edi i na vetutuyamediga, ta na 'asetai tomogonina mogitana Yaubada taiadi i miamia.

S1 Ibu 9:24S2 Lom 3:25 Ion 1:29, 11:52S4 1 Ion 1:6,8
S5 Ion 14:21,23 1 Ion 4:12,17, 5:3S6 Ion 13:15

Veimea 'ivauna.

7 Ekwavo a na vonemi. Veimea de'e kebu 'ivaunaga, tuatuaina, kumanina basenadi 'wa 'asetai tutuyanina Iesu Valana 'wa nogai. Side bani'odi, ma emiavo 'wa na venuakalikali. Veimeanina tuatuaina ma 'ana 'aseta 'waimie. 8 Siwe tutuya fuedi veimeanina bani'odi i veve'ivau wata ta 'asetai veimea mogitana fai Iesu Keliso i vematayakeyakeni, 'omi wata bani'odi. Veimeanina ta na vematayakeyakeni ma edavo ta na vevenuakalikaliga, sakona 'waideye bani'odi dudubala i mweamwea ma'itufa Keliso yana mageta mogitana i 'a'awaiaia.

9 Aitoi i na vo, Yau Keliso yana mageta nageneye a miamia,” we'e enavo ma fuedie Keliso 'waineye i miamiani i vedumwe'ai'aiediga, taunina bola dudubala 'waineye i miamia. 10 We'e aitoi enavo i nuakalikaliedi, taunina Keliso yana mageta 'ana tomia, kebu 'ana fata tamu nani 'waineye i na be'u. 11 Aitoi enavo ma fuedie Keliso 'waineye i miamiani i na vedumwe'ai'aiediga, taunina dudubala 'ana tomia. Fai dudubalanina nuana i 'ivegaugauya bega ava'aibe bei i nunagoga kebu i da 'asetaiga.

12 Natukwavo a vonevonemi fai Yaubada yami sakona i nuatavunidi Iesu Keliso yana wafa 'wainega.

13 'Omi tama a vonevonemiga fai kumanina 'eba velamuyega i mia-vagata 'akonadi 'wa 'asetai mogitana.

We'e 'omi tubuvauvau iavetami a vonevonemi fai Seitani taunina Tosakona 'wainega 'wa vetoketoke.

14 Natukwavo, a vonevonemi fai Tamada 'wa 'asetai mogitana.

We'e 'omi tama a vonevonemi fai kumanina 'eba velamuyega i mia-vagata 'akonadi 'wa 'asetai mogitana.

'Omi tubuvauvau iavetami a vonevonemi fai 'omi toketokemi, wata fai Yaubada yana Vona nuamie i 'eno'enovi, wata fai Seitani taunina Tosakona 'wainega 'wa vetoketoke.

S7 2 Ion 1:5-6S8 Ion 1:9 Lom 13:12S9 1 Ion 3:10,15, 4:20
S10 Lom 14:13S11 Ion 12:35S12 1 Kol 6:11

Fwayafwaya 'ana nuanua kebu nuami i na 'ewadi.

15 Kebu nuanuaku 'ai'aiwabu nuami i na 'ewadiga, wata tomotoganidi fwayafwaya 'ana nuanua 'waidie bwaikina, yadi sauluva kebu 'wa na vetutuyamediga. 'Ai'edi aitoi fwayafwaya 'ana nani i na nuakalikaliediga, Tamada 'ana nuakalikali kebu 'waineye i da 'eno'eno. 16 Nani fuedi fwayefwayeye kebu Tamada 'wainega i da maiga. Bani'odi bunu 'ana nuagiva sakoidi, naninidi i 'ise'isediga nuanuadi bwaikina, wata nualaka taunidi yadi 'ai'aiwabu faifaidi. Naninidi kebu i da maia Tamada 'wainega, i mai de'e fwayafwaya sakoina 'wainega. 17 Fwayafwaya de'e sai'afoga i na 'a'ava, wata naninidi sakoidi tomotoga nuanuadi taiadi i na 'a'ava. Siwe egavo Yaubada yana nuanua i vevematayakeyakedi i na mia-vagata.

S15 Lom 8:7 Iem 4:4S17 Mad 7:21

Keliso 'ana Gavia.

18 Natukwavo, tutuya 'eba ve'a'ava sai'afoga i na souyeni. 'Akonadi 'wa 'asetai nagami Keliso 'ana Gavia i na mai, igodi i na vo, Yau tauniku Keliso,” mulieta tutuya 'ana 'eba ve'a'ava. Tutuya de'e 'akonadi Keliso 'ana gaviavo i sousouyedi begaidi ta 'asetai fwayafwaya de'e sai'afoga i na 'a'ava. 19 Keliso 'ana gavianidi basenadi 'ada 'aila'a nageneye i miamiani, siwe kebu mogitana Keliso i da nuakalikalieni begaidi i baileda. 'Ai'edi tomotoganidi Keliso i da nuakalikalieniga, taiadi ta da miamiani 'ada 'aila'a nageneye, siwe i baileda bega ta 'aseta-'atumaia matatabudi kebu 'ada 'aila'aga.

20 Tobailanidi kebu nuanuadi Keliso, we'e 'omi Keliso yana 'anivelena 'Anu'anunu 'Atumaina 'akonadi i agemi, begaidi matatabumi Yaubada yana nuanua tonovidi 'wa 'asetadi. 21 Kebu 'wa da bavuyedi faifaina a da vonevonemi, fai 'wa 'asetadi Yaubada yana nuanua tonovidi begaidi a vonevonemi. Yana nuanuananidi 'waidiega kebu tamu vekali i da sousouyeni.

22 Aitoi i vonaga i vo, Iesu kebu Yaubada 'ana Venua'ivinaga,” taunina mogitana tovekali, wata Keliso 'ana gavia fai Tamada wata Natuna i vedumwe'ai'aiedi. 23 Fai Yaubada Natuna i vedumwe'ubu'ubuseni, Tamada kebu i da labilabini. We'e 'ai'edi aitoi ma yana vetumagana taunina i tauyeni Yaubada Natuna 'waineye, Tamada i labilabini.

S18 Mad 24:5,24 2 Ion 1:7S19 Fol 20:30S22 Mad 10:32-33 1 Ion 4:3 2 Ion 1:7
S23 Mad 10:32-33 Ion 5:23 2 Ion 1:9

'Anu'anunu 'Atumaina 'asa'aiana yada Tove.

24 Iesu Valana 'wa nogaiga 'eba velamuyega, bega i lubwainemi 'wa na nunuave'avini. 'Ai'edi Valanina 'wa na nunuave'aviniga, Tamada wata Natuna taiadi 'wa na miave'itubama. 25 Keliso taunina basenadi i vona'awaufaufa 'waideye tamu nani i na veleda. Naninina, mia 'atumaina wata miamia-vagaina.

26 Keliso 'ana gaviavo igodi nuanuadi i na vekaliemi, begaidi de'e faifaidi a kilukiluma 'waimie. 27 We'e 'omi kebu tovenidi bani'odi, basenadi 'Anu'anunu 'Atumaina i agemi, Keliso yana 'anivelena. Keliso 'Anu'anununa nagemie i na miamiaga, kebu 'wa na vo, Aitoi i da ve 'waideye?” 'Anu'anununina nani matatabuna i veve 'waimie, yana ve tonovidi kebu tamu sai'afo i na vekaliemiga. Fai yana ve matatabuna tonovidi, begaidi i lubwainemi 'wa na vevematayakeyakedi Keliso taiadi 'wa na miave'itubama.

28 Natukwavo, vona mogitana nuanuaku Keliso taiadi 'wa na miave'itubama, bega tutuyanina i na souyeniga, kebu ta na bunumayaga, ma yada venuafoufa'ala ta na tovoi mataneye. 29 'Akonadi 'wa 'asetai Keliso yana sauluva tonovidi wata 'atumaidi. Begaidi i lubwainemi 'wa da 'asetai, egavo yadi sauluva tonovidi wata 'atumaidi, taunidi Yaubada natunavo.

S25 Ion 3:15, 6:40S27 Ion 14:26S28 1 Ion 4:17S29 1 Ion 3:10